Bloga

"Nerabezaroa, aukerarako aroa" izenburupean, kongresu bat antolatzen ari gara Donostian, profesionalei begira gehienbat: psikologoak, pedagogoak, familia-terapeutak, irakasleak, orientatzaileak…; hots, hezkuntzaren esparruan zein terapiarenean nerabeekin eta beren familiekin lan egiten dutenentzako kongresua da.

Kongresu honen bidez, tratu onen kultura hedatu nahi dugu, bai hezkuntzan, bai familian, bai gizartean; izan ere, tratu onen kultura behar-beharrezkoa da, gizarte osasuntsu bat garatuko badugu.

Kongresuan, bada, ongi tratatzen duen gurasotasunari loturiko gaiak jorratuko dira; atxikimendu era desberdinak berraztertuko ditugu, bai eta era bakoitzaren araberako ezaugarri pertsonalak ere. Halaber, haurtzaroko bizipenen traumei aurre egiteko eta gainditzeko modu egokiez diharduten arloak landuko dira, eta nola sustatu erresilientzia, hau da, aurkako egoerak gainditzeko gaitasuna.